كل انتخابات بلدية وانتو بخير

10 حزيران 2010 - هادي صفي الدين

يا اخواتي يا لبنانيي، وحياة الله انو قلبي معاكن. كتير عم فكّر فيكون (فينا) لك يا عمّي ما حلّنا نتعلّم. شو بنا ولللللوووو. كل العالم بتعرف انو الحمار بفوت بالحيط أوّل مرّة تاني مرّة ببعّد عنّوا. طيب بالنسبة انو نحنا اللبنانيي صرلنا 40 سنة عم نفوت بنفس الحيط. شوووووو؟!؟!؟!؟!

لك بسيطة صيت وطالع، شو بدنا نعمل ـ من ايدنا والله، بس ياخوفي انو اذا اخدنا قرار انو ما نفوت بالحيط يصير شي ما حدا منّا بحبّو!!!! يعني الله يخليلنا هالاخوان السياسيين المعوّدين انو يفوّتوا العالم بالحيطان، أو يفوّتوا العالم بمشاكلن السياسيّة الشخصية، أو يفوتوا الدول لي ما الا خصّا بربنا بحياتنا - يعني ما بعرف يا اخواتي يا لبنانيي اذا لاحظتوا معي كلمت ((يفوّتوا)) كم مرّة - so جهّزوا حالكن لا يفوت فيكن شي محرز اذا قررتوا ما ترجعو تفوتوا بالحيط (يعني المهم شي يفوت بشي). بس ما لازم تنوجعوا ولا لازم تتراجعوا، اصلاً هني صح رح يفوّتوا فيكن شي محرز، بس انتبه هيدا كلّوا لمصلحتك و مصلحة بلدك أولاً.

أنو حاسسكن مستغربين حكيي، شو صايرلكم ولووو. ما صرلن 40 سنة عم يفوّتوا فينا كتير اشيا، مثلاً خازوق الحرب الاهلية على سبيل المثال يعني - لك وقتا صح انا ما كنت خلقان بعد بس انو بسمع انو الخي قتل خيّو. ايه والله اكبر من هيك خازوق ما شفت، وآلذ شي انو كانو عم يخوزقونا ونحنا مبسوطين، يعني برضانا.

يا خيي ما رح احكي تاريخ، من سنه ما فوتولنا خازوق الانتخابات النيابية؟!؟!؟! اي واالله طلع من راسكن يا شعب لبنان العظيم، هي هي هي آل عظيم آل..... لكن يا شباب الله يعظّم اجركن وشو بدكن تعملوا..... يعني البلد بدّو تضحية ليمشي، بس تضحية من نوع آخر. . .

شو يا اخواتي. . . حسيّتو بشي؟؟

اذا حسيتوا بشي يعني انتوا بلّشتوا تصيرو وطنيين - ايه ايه هاي اوّل خطوة على طريق الوطنية..... هذه هي التضحية الحقيقية. . . بس عشان حطكن بالجو المفاجأة انو الوطنية بدلّعوها "مشوار الالف ميل" يعني ما تيأسو من أول خازوق عندكون بعد منّوا 999 بعد، بعدون عم يدلّعونا هلّق، كيف لعنجد نبلّش بالسخن!؟!

والله السياسين عنّا ذكايا، بس للاسف ذكائن مشرّاني، آآخ لو بيستعملو هالراس بطريقة صح (لو يعني ياريت) اول ضربة في طريق الوطنية - " الانتخابات البلدية " - اجمل نكتة بالدني، آل شو انتخابات بلدية، الاحزاب اللبنانية تتحالف مع العائلات (اكيد من اجل الانماء) و اكيد كمان انوا الحملات الانتخابية موّجه الك يا مواطن، عنجد بس تسمع بأسم اللوائح بينشرح صدرك، بس لمّا تربح هاي اللوائح بينشرح --- وبينفتح ضهرك.

ونحنا اللبنانيي بعدنا عم ننزل ننتخب، لك يا الله مصار عندكن خبرة انو الانتخابات ضحك عليكن؟! والاضرب من هيك انو عم نعمل مشاكل بكل دورة انتخابية. شفتوا كيف انّو الحق علينا نحنا.

بدّي الكن شي يا اخواتي: على هالحالة لنحنا ماشيين عليها، بدنا 100 سنة لنصير حمير، وبعدين الله بفكّر يعملنا بني أدمين.

ودايمين يا اخواتي وكل انتخابات بلدية وانتو بخير.