| Email: elie@kobayat.org |
|
back to Mortality 2009 |
Charbel Mtanios Issa
Kobayat, Ghowaya, passed away on 30 April 2009
في صوت الغد شبكنا الصوت ...وضعنا لك الاكليل ...شربل عيسى في دار الخلود....
بصفتي زميلتك وبنت ضيعتك, بنت الحي وبنت عيلتك اسمحلي
يا شربل اعتذر منك باسمي واسم ريم اوجومانا ,جو وماري-جو, باسم رامونا ,انطونيو
ونسرين,باسم رولا و فوكس وبول,باسم ايلي وجوني ومايك,باسم دانيال وروبير ,باسم وديع
ابو جودة وصوت الغد لبنان الاردن واوستراليا, باسم صوت الغد الاخبار وحبيب يونس –
باسم 11 سنة و 133 يوم
منعتذر منك لانو كذبنا عليك...
كذبنا عليك لانو كنا عارفين كل شي ومش قادرين نقلك شي..
كنا عم نعطيك امل كذاب...عم تتحسن يا بولا...اليوم وجهك احسن..حتى انا كذبت عليك..
اخر مرة وصلتك فيا عالبيت قلتللي مش حرام شب متلي ما بفوت من الباب يروح...قلتلك
لوين بدك تروح بتهون!!قللي اي حكيم بدك احكي بركي بيعرف شي..ودقيت قدامك لحكيم
قلتللي سكري ما بيعرف شي ليكي اجريي كيف مورمين قلتلك اكيد معك موالح...
كنت عم توقع وعم نوقع معك ,عم تقشط وعم نقشط معك...
قلتلك ليش لابس توب مار شربل لباس توب مار جرجس هيدا عيدو,هيدا الفارس ,قول يا رب
قول يا بو رمح...قلتلي مار شربل عاسمي انت صللي عني لمار جرجس...
وحياتك يا بولا صلليتلو..قلتللو باخر ليلة انا وحدك بالمستشفى انت وبالكوما قللتلو
ياخدك لعندو اذا بدك تضلك تتعذب, واخذك لعندو ...
يا بولا كان حرقة بقلبك انو بيك قبل ما يموت من شهرين قللو ليسوع: يا يسوع شيل
المرض من شربل وحططو فيي,وبس مات كنت عم تبكي مقهور انو مات فدى عنك وصارت عجيبة ,
يا بولا ارتاح..لانو العجيبة هيي انو بي وابنو يموتوا ورا بعضن باقل من شهرين ...
يسوع ادرى مننا يا بولا ..ما بدو يخللي بيك لوحدو هونيك ..بيك يللي موت حالو من
البكي عنا بالاذاعة بس خبرنا من سنة شو بيك وصار يخبط عراسو ويقول راح شربل راح
شربل ...
يا بولا منعتذر منك اذا كذبنا عليك...كذبتنا بيضا متل قلبك الابيض ...يا خينا انت
يا رفيقنا انت ..
روح الله معك, خللي عينك علينا وعالاذاعة واذا شي نهار وقف الهوا وما كان في حدا
يمشي....
تبقى من عندك من فوق عطينا هوا...
لورين ايليا قديح