صوت ماشي عالْهدى

جايي القلب يرتاح

بيوصَل لَجوى صدى

ولْباقي بيلْحَق لْرياح.

ونسمي لْتَفتِتْ لَورى

بتقشع كلمي مبعثرا

وحرف عن حرف زاح.

والكلمي جسما اْهترى

وانكَسَر منها جناح

والجانح التاني اشترى

من الْنسمي نفحة دواَ

تا برْكي بيطرا لْجراح.

.....   ...

وقلبي بيسأل الْصدى

إنتَ جايي من حدا؟

لْوين أولك هوي راح؟

من ذاتو بيطلع القلب

سامع صوت عالْتلال

حرفو من خيوط السما

من تِمّْ ملايكي اْرتمى.

ونجمي مضوّايي عالدرب.

ورعيان نازلي مْنْ جبال

قنديلا زيتو رَجا

لْعندا هالحدا إِجا.

القلب توانس ومشي

وعا خيال دعساتا لْتجا

وصَّل... وكانِت الْدَهشي

لِقي الْحَدا للصدى

نايم بقلب كم قشِّي

حامل بقلبو عهدَين

يكمَلْ الأول... والتاني اْبتدا

والكلمة جوانحا حرفين

هوي الكلمي لْذاتو "حُب"

انسان زغيَّر صار الرب

وقلبك مغارة مقفلي

بصمتا ضلَّك اْختشي

من الحُب انت منحَب

هوي الباب والمفتاح

وهوي هيدا هالحدا

عا عمق ذاتك راح

منّو إجا هالصدى

فتحلو قلبك تا يرتاح

... .... .....

وقلبي بيسأل الصدى

إنتَ جايي من حدا؟

لوين أولك هوّي راح؟

القلب تطلع وتعَجَّب

هيدا الله بذاتو

حبو بالفقر انكتب

المذود أول صفحاتو

مفهوم الكون انقلب

تغيّر معنى كلماتو

الكلمي لكانت تنسَمَع

والصمت كانت تتحدى

صارت بمذود تنقشَع

 وبعمق سرّو تنْفَهم

لأنا بتبقى هالحدى

الماشي دوماً عالهدى

عا عمق القلب راح.

.........

والصمت سرّو انفهم

بلوحة نور وعتمات

بقلب يوسف ومريم

لْركعاتن نغمة همسات

ذاتو بقلْبـن تلملم

يتأمل سر الحيـاة

لْبَلَّش  سروّ بألم

مهجَّر ماشي عالطرقات

ودم طفال وصرخات

يطلَع من قلوب الامات

طاغي ظالم انتقم

تا ما يملك غيرو حدى

....

وبلّش سرّ الفدا

وانجلى سرّ الصدى

....

القلب.. لحقوا وراح

يجيبوا لعندوا يرتاح

مهجَّر بعدو بين الناس

وعم ينزف بعدو الجراح

والحب بيبقى الدوى

لْمنو الجرح بينشفى

وينلَم الحرف لْزاح

وهوي بعدو المفتاح

مدّ إيدَك ييلا فتاح

المسكي بقلبك من جوّآ

وضلَّك ديماً مرتمي

بقلب قلبو ومحتمي

واشعارك لكانت صدى

صارت كلمات المدى

هوي الكلمي والاشعار

لحقو صوب السما طير

السما قلبك لْزغير

وتأمل دوماً هالحدى

وصوب السما حاول طير

وما حدا غيرو لْجناح

وقلبي بيسأل الصدى

انت جايي من حدا

لوين اولك هوّي راح؟